مقبوضہ بیت المقدس میں اسرائیلی فورسز نے مسجد اقصیٰ کے امام شیخ محمد العباسی کو حراست میں لے لیا۔ فلسطینی میڈیا کے مطابق انہیں مسجد کے احاطے سے بغیر واضح وجہ بتائے گرفتار کیا گیا۔
رپورٹس کے مطابق گرفتاری سے چند گھنٹے قبل حکام نے انہیں ایک ہفتے کے لیے مسجد میں داخلے سے روک دیا تھا۔ شیخ محمد العباسی کا کہنا ہے کہ پابندی کی کوئی وجہ نہیں بتائی گئی، جبکہ وہ ایک سال قبل پیش آنے والے سنگین حادثے کے بعد دوبارہ اپنے مذہبی فرائض انجام دینے کے لیے واپس آئے تھے۔
یہ پیش رفت ایسے وقت میں سامنے آئی ہے جب رمضان کی آمد پر عبادات کی تیاریاں عروج پر ہیں اور نمازیوں کی آمد متوقع ہے۔ دوسری جانب حماس نے اس اقدام کی مذمت کرتے ہوئے اسے مذہبی امور میں مداخلت قرار دیا ہے۔