چین کے دارالحکومت بیجنگ میں ایک 89 سالہ خاتون نے غیر معمولی جرات کا مظاہرہ کرتے ہوئے فلیٹ میں بند ہونے کے بعد 27 منزلہ عمارت کی بیرونی دیوار سے نیچے اترنے کی کوشش کی۔
واقعہ اس وقت سامنے آیا جب ایک سیکیورٹی گارڈ نے باہر سے مدد کی آواز سنی اور اوپر دیکھا تو خاتون ایئر کنڈیشنر کے سہارے کھڑی تھیں۔ اطلاع ملنے پر ریسکیو ٹیم فوری پہنچ گئی، تاہم خاتون آہستہ آہستہ نیچے اترتی رہیں اور تھکن کے باعث ایک منزل پر رک گئیں۔
بعد ازاں فائر فائٹرز نے اندر سے کارروائی کرتے ہوئے انہیں حفاظتی رسی کے ذریعے محفوظ مقام پر منتقل کر دیا۔
رپورٹس کے مطابق خاتون اکیلی رہتی تھیں اور غلطی سے کمرے میں بند ہو گئیں جبکہ موبائل فون باہر رہ گیا تھا، جس کے باعث انہوں نے یہ خطرناک قدم اٹھایا۔ خوش قسمتی سے انہیں کوئی جسمانی نقصان نہیں پہنچا، البتہ وہ شدید خوف اور تھکن کا شکار ہو گئیں۔