ایران اور امریکا کے درمیان متوقع مذاکرات کی منسوخی سے متعلق قیاس آرائیوں کے بعد دونوں ممالک کے حکام نے تصدیق کر دی ہے کہ بات چیت اپنے مقررہ شیڈول کے مطابق جمعے کو مسقط میں ہوگی۔ ایرانی وزیر خارجہ عباس عراقچی نے سوشل میڈیا بیان میں بتایا کہ جوہری امور پر مذاکرات صبح 10 بجے شروع ہوں گے، جبکہ انہوں نے میزبانی کے انتظامات پر عمان کا شکریہ بھی ادا کیا۔
امریکی ذرائع نے بھی میڈیا سے گفتگو میں عمان میں مذاکرات کے انعقاد کی تصدیق کی ہے۔ اس سے پہلے یہ بات چیت ترکیے میں متوقع تھی، تاہم بعد میں مقام کی تبدیلی کی تجویز سامنے آئی۔ ایران کی جانب سے یہ مؤقف بھی دیا گیا تھا کہ مذاکرات کا دائرہ صرف جوہری معاملے تک محدود رہے، البتہ اس بارے میں حتمی سفارتی تفصیلات ابھی واضح نہیں کی گئیں۔