نئے سال کی آمد کے پیش نظر مری میں دفعہ 144 نافذ کر دی گئی ہے۔ آئندہ دو روز مال روڈ پر صرف فیملیز کو داخلے کی اجازت ہوگی جبکہ بیچلر سیاح شہر کے دیگر مقامات پر جا سکیں گے۔ پولیس کے مطابق یہ فیصلہ سیاح خاندانوں کو محفوظ اور پُرسکون ماحول فراہم کرنے کے لیے کیا گیا ہے۔
دوسری جانب متوقع برف باری کے باعث محکمہ ہائی وے پنجاب کو الرٹ کر دیا گیا ہے۔ صوبائی وزیر ملک صہیب احمد بھرتھ نے سڑکوں کو کھلا رکھنے، برف ہٹانے کی مشینری فعال رکھنے اور نمک کے بروقت استعمال کی ہدایت دی ہے۔ مری اور گلیات میں سہولت مراکز اور سالٹ کیمپس بھی قائم کر دیے گئے ہیں تاکہ آمد و رفت ہر حال میں برقرار رہے۔