سندھ ہائی کورٹ نے کراچی ڈویلپمنٹ اتھارٹی (کے ڈی اے) کو مرحوم افسر کے قانونی وارث کو بقایا واجبات ادا کرنے کا حکم دے دیا ہے۔
سماعت کے دوران درخواست گزار کے وکیل نے مؤقف اختیار کیا کہ واجبات تسلیم کیے جانے کے باوجود مکمل ادائیگی نہیں کی گئی، جبکہ کے ڈی اے نے مالی مشکلات کا جواز پیش کرتے ہوئے بتایا کہ اب تک ساڑھے 3 لاکھ روپے ادا کیے جا چکے ہیں۔
عدالت نے قرار دیا کہ پنشن اور ریٹائرمنٹ کے واجبات ملازمین کا قانونی حق ہیں، جنہیں مالی مسائل کی بنیاد پر روکا نہیں جا سکتا۔ عدالت نے کے ڈی اے کو درخواست گزار کو ایک کروڑ 10 لاکھ روپے ادا کرنے اور عمل درآمد رپورٹ رجسٹرار سندھ ہائی کورٹ میں جمع کرانے کی ہدایت بھی جاری کی۔