یورپی یونین کی خارجہ امور کی سربراہ کایا کالس نے کہا ہے کہ ایران کی موجودہ صورتحال انتہائی سنگین ہے اور خطے کو ایک اور جنگ کی ضرورت نہیں۔
برسلز میں یورپین فارن افیئرز کونسل کے اجلاس سے قبل گفتگو کرتے ہوئے انہوں نے کہا کہ خطہ پہلے ہی کئی چیلنجز سے دوچار ہے، اس لیے مزید کشیدگی کسی کے مفاد میں نہیں۔
کایا کالس کا کہنا تھا کہ یورپی یونین نے ابتدا ہی سے اس بحران کے حل کے لیے سفارتی راستہ اختیار کرنے پر زور دیا ہے اور وہ اس سلسلے میں اپنا کردار ادا کرنے کے لیے تیار ہے۔
انہوں نے واضح کیا کہ معاملہ صرف جوہری پروگرام تک محدود نہیں بلکہ اس میں بیلسٹک میزائل پروگرام اور ایران سے متعلق دیگر خدشات بھی شامل ہیں۔
ان کے مطابق موجودہ حالات میں ایران پہلے کے مقابلے میں کمزور پوزیشن میں دکھائی دیتا ہے، تاہم اس موقع کو جنگ کے بجائے سفارتی حل تلاش کرنے کے لیے استعمال کیا جانا چاہیے تاکہ خطے میں استحکام برقرار رکھا جا سکے۔