اسرائیلی وزیر اتمار بن گویر کی ایک ویڈیو نے عالمی سطح پر شدید تنازع کھڑا کر دیا ہے، جس میں وہ غزہ جانے والے فلوٹیلا کارکنوں کے ساتھ طنزیہ رویہ اپناتے دکھائی دیے۔ ویڈیو منظرِ عام پر آنے کے بعد اسرائیل کو مختلف ممالک کی جانب سے تنقید اور سفارتی دباؤ کا سامنا کرنا پڑ رہا ہے۔
رپورٹس کے مطابق اسرائیلی بحریہ نے بین الاقوامی پانیوں میں فلوٹیلا جہاز روک کر متعدد کارکنوں کو حراست میں لیا، جن میں کئی افراد نے احتجاجاً بھوک ہڑتال بھی شروع کر دی۔ اس واقعے پر اٹلی، فرانس، اسپین، نیدرلینڈز اور کینیڈا سمیت مختلف ممالک نے اسرائیلی سفیروں سے احتجاج کیا۔
ماہرین کا کہنا ہے کہ اس ویڈیو نے اسرائیل کی عالمی سطح پر مثبت تشخص قائم کرنے کی کوششوں کو نقصان پہنچایا ہے۔ فلسطینی اور انسانی حقوق کے حلقوں نے اسے طاقت کے استعمال اور انسانی حقوق کی صورتحال کی ایک واضح مثال قرار دیا ہے۔