بھارتی ریاست کرناٹک میں ایک شخص نے مبینہ طور پر اپنی بیوی اور دو کمسن بیٹیوں کو قتل کرنے کے بعد خودکشی کر لی۔
بھارتی میڈیا کے مطابق یہ واقعہ ضلع ہنسور کے علاقے نیو ماروتھی لے آؤٹ میں پیش آیا۔ ہلاک ہونے والوں کی شناخت 49 سالہ ہریش، 36 سالہ نشچیتا، 13 سالہ نیکسا اور 6 سالہ رکھشا کے نام سے ہوئی ہے۔
ابتدائی تحقیقات کے مطابق ملزم نے پہلے اپنی بیوی اور دونوں بیٹیوں کے منہ ٹیپ سے بند کیے اور مبینہ طور پر دم گھونٹ کر انہیں قتل کیا، جس کے بعد گھر کی بالائی منزل پر جا کر پھندا لگا کر خودکشی کر لی۔
پولیس کا کہنا ہے کہ گھر سے ایک خودکشی نوٹ بھی ملا ہے، جس میں اپنی آخری خواہشات سے متعلق چند ہدایات درج تھیں۔
حکام کے مطابق واقعے کی اصل وجہ تاحال سامنے نہیں آئی، جبکہ پولیس نے مقدمہ درج کر کے مختلف پہلوؤں سے تحقیقات شروع کر دی ہیں۔