مکہ مکرمہ کے حرا کلچرل ڈسٹرکٹ میں قائم قرآن میوزیم میں 11ویں صدی ہجری کے ایک نایاب قرآن مجید کے نسخے کی نمائش کی جا رہی ہے جو زائرین کی خصوصی توجہ کا مرکز بنا ہوا ہے۔
اس قدیم نسخے کے صفحات پر سنہری نباتاتی نقش و نگار اور نفیس آرائشی ڈیزائن موجود ہیں، جبکہ اس کی تزئین میں استعمال ہونے والے رنگ اس دور کے فنی ذوق اور روایت کی عکاسی کرتے ہیں۔
قرآن مجید کے ابتدائی صفحات کو انتہائی باریک اور خوبصورت انداز میں ترتیب دیا گیا ہے، جہاں سورہ الفاتحہ کو متوازن خطاطی اور آرائشی عناصر کے ساتھ تحریر کیا گیا ہے۔
میوزیم حکام کے مطابق یہ نایاب نسخہ اسلامی خطاطی اور فنِ تزئین کی اعلیٰ مہارت کا مظہر ہے، جو قرآن کریم سے عقیدت اور اسلامی تہذیب کے فنی ارتقا کو نمایاں کرتا ہے۔