سعودی وزیر خارجہ شہزادہ فیصل بن فرحان نے مصر کے شہر العالمین میں مصر اور ترکیہ کے وزرائے خارجہ سے ملاقات کی، جس میں مشرق وسطیٰ کی موجودہ علاقائی صورتحال اور اہم پیش رفت پر تبادلہ خیال کیا گیا۔
ملاقات میں ترکیہ کے وزیر خارجہ ہاکان فیدان اور مصر کے وزیر خارجہ ڈاکٹر بدر عبدالعاطی بھی شریک تھے۔ تینوں رہنماؤں نے خطے میں جاری حالات، سلامتی اور باہمی تعاون سے متعلق امور پر گفتگو کی۔
دوسری جانب مصر اور ترکیہ کے وزرائے خارجہ نے مشترکہ منصوبہ بندی گروپ کے دوسرے اجلاس کی بھی صدارت کی، جس کا مقصد دونوں ممالک کے درمیان سیاسی، اقتصادی اور دیگر شعبوں میں تعاون کو مزید مضبوط بنانا ہے۔
ترک وزیر خارجہ ہاکان فیدان نے مصر کو سعودی عرب، پاکستان اور ترکیہ کے درمیان طے پانے والے مکہ مشترکہ دفاعی معاہدے میں شمولیت کی دعوت دینے پر زور دیا۔ انہوں نے کہا کہ مکہ میں تینوں ممالک کی جانب سے رکھی گئی بنیاد ایک اہم قدم ہے اور ترکیہ اس معاملے پر مصر کے ساتھ مسلسل مشاورت کر رہا ہے۔