بھارتی ٹیلی وژن کی معروف اداکارہ شویتا تیواری کو ڈینگی کی تشخیص کے بعد اسپتال میں داخل کرادیا گیا ہے۔ بھارتی میڈیا کے مطابق 45 سالہ اداکارہ چند روز سے علیل تھیں، جس کے بعد ان کے اسپتال میں داخل ہونے کی خبر سامنے آئی۔ خبر پھیلنے کے بعد مداحوں نے سوشل میڈیا پر ان کی صحت کے حوالے سے تشویش کا اظہار کیا اور جلد صحتیابی کے لیے نیک خواہشات کا اظہار کیا۔
شویتا تیواری اس وقت ریئلٹی شو ’دی ٹریٹرز سیزن 2‘ کا حصہ ہیں، جس میں مجموعی طور پر 21 شرکا شامل ہیں۔ شو کا آغاز 13 اگست کو پرائم ویڈیو پر ہوا، جبکہ اداکارہ اپنے بے باک انداز اور برجستہ جوابات کے باعث پہلے ہی خاصی توجہ حاصل کرچکی ہیں۔
شویتا تیواری کی بیماری کی خبر ایسے وقت میں سامنے آئی ہے جب ان کے سابق شوہر راجا چوہدری کا ایک انٹرویو بھی سوشل میڈیا پر زیرِ بحث ہے، جس میں انہوں نے اپنی سابق ازدواجی زندگی کے حوالے سے مختلف دعوے اور الزامات عائد کیے ہیں۔ تاہم موجودہ توجہ اداکارہ کی صحت اور ان کی جلد صحتیابی پر مرکوز ہے۔