سعودی عرب کی وزارتِ ماحولیات، آب و زراعت 28 جون سے 2 جولائی تک جدہ میں ’سعودی واٹر وِیک‘ کے افتتاحی سیشن کی میزبانی کرے گی۔
اس ایونٹ کا مقصد پانی سے متعلق چیلنجز پر عالمی سطح پر گفتگو کو فروغ دینا اور آبی وسائل کے پائیدار انتظام کے لیے نئے حل اور پالیسیوں پر تبادلہ خیال کرنا ہے۔ پروگرام میں ماضی کے آبی فورمز کے تجربات سے استفادہ کرتے ہوئے مستقبل کے منصوبوں کو مزید مؤثر بنانے پر توجہ دی جائے گی۔
اس ہفتے کے دوران مختلف ممالک سے تعلق رکھنے والے پالیسی ساز، ماہرین، محققین اور نجی شعبے کے نمائندے شرکت کریں گے، جبکہ متعدد پینل مباحثے، ورکشاپس اور خصوصی سیشنز بھی منعقد ہوں گے۔ ایونٹ میں ’عرب واٹر فورم‘ اور دیگر اہم اجلاس بھی شامل ہوں گے۔
حکام کے مطابق یہ پلیٹ فارم نہ صرف عالمی تعاون کو فروغ دے گا بلکہ سعودی وژن 2030 کے تحت آبی شعبے میں سرمایہ کاری اور جدید ٹیکنالوجی کے استعمال کے مواقع بھی بڑھائے گا۔