وزیراعظم شہباز شریف نے یومِ دستور کے موقع پر اپنے پیغام میں آئین ساز رہنماؤں کو خراجِ تحسین پیش کرتے ہوئے آئین کو ریاست اور عوام کے درمیان ایک مضبوط معاہدہ قرار دیا۔ انہوں نے کہا کہ 1973 کا آئین ملک میں پارلیمانی جمہوریت کی بنیاد ہے اور شہریوں کے حقوق و فرائض کی واضح رہنمائی فراہم کرتا ہے۔
ان کا کہنا تھا کہ یہ آئین قومی اتحاد اور وفاق کی مضبوطی کی علامت ہے، جبکہ تمام اکائیاں ملک کی ترقی اور خوشحالی کے لیے مشترکہ کوششیں کر رہی ہیں۔ وزیراعظم نے اس عزم کا اظہار بھی کیا کہ پاکستان عالمی سطح پر ترقی کرتا رہے گا اور قوم ایک روشن مستقبل کی جانب گامزن رہے گی۔