ایرانی خواتین فٹبال ٹیم کی کپتان زہرا غنبری نے آسٹریلیا میں سیاسی پناہ کی اپنی درخواست واپس لے لی ہے۔
ایرانی سرکاری خبر ایجنسی کے مطابق زہرا غنبری ملائیشیا کے راستے ایران واپس جانے کا ارادہ رکھتی ہیں۔ وہ اس ٹیم کی پانچویں رکن ہیں جنہوں نے پناہ کی درخواست واپس لی ہے۔
اس سے قبل تین کھلاڑیوں اور ایک اسٹاف ممبر نے بھی اپنی درخواستیں واپس لے کر ایران واپسی کا فیصلہ کیا تھا۔
آسٹریلیا کے وزیر داخلہ نے بتایا تھا کہ ٹیم کی تمام کھلاڑیوں اور اسٹاف کو پناہ کی پیشکش کی گئی تھی تاکہ ایران واپسی پر کسی ممکنہ مشکل سے بچا جا سکے۔
یہ خدشات اس وقت بڑھے تھے جب ٹیم کے کھلاڑیوں نے پہلے میچ میں ایران کا قومی ترانہ پڑھنے سے انکار کیا تھا، تاہم دوسرے میچ میں کھلاڑیوں نے قومی ترانہ پڑھ کر اپنے ملک کو سلام پیش کیا، جس کے بعد یہ خدشات پیدا ہوئے کہ شاید وہ دباؤ کے تحت ایسا کر رہی تھیں۔