ایران میں گرلز اسکول حملے پر امریکی سینیٹرز کا سخت ردعمل، تحقیقات کا مطالبہ

امریکی سینیٹ کے ڈیموکریٹک سینیٹرز نے ایران کے شہر مناب میں گرلز ایلیمنٹری اسکول پر ہونے والے حملے کی شفاف اور غیر جانبدار تحقیقات کا مطالبہ کیا ہے۔ عرب میڈیا کے مطابق اس حملے میں کم از کم 170 افراد جاں بحق ہوئے جن میں بڑی تعداد کم عمر بچیوں کی بتائی جاتی ہے۔

سینیٹرز نے مشترکہ بیان میں کہا کہ اسکول کے بچوں کو نشانہ بنانا انتہائی افسوسناک اور ناقابلِ قبول ہے، اس لیے امریکی محکمۂ دفاع واضح کرے کہ یہ واقعہ کیسے پیش آیا اور کیا کسی پالیسی فیصلے نے اس میں کردار ادا کیا۔ بیان پر برائن شاٹز، جین شاہین، جیک ریڈ اور الزبتھ وارن سمیت کئی اہم ڈیموکریٹ رہنماؤں نے دستخط کیے۔

میڈیا رپورٹس کے مطابق نئی ویڈیوز سے عندیہ ملا ہے کہ حملہ ممکنہ طور پر ٹوماہاک میزائل سے کیا گیا۔ دوسری جانب امریکی صدر ڈونلڈ ٹرمپ نے دعویٰ کیا ہے کہ حملہ ایران نے خود کیا، جبکہ وزیرِ دفاع پیٹ ہیگسیتھ نے کہا ہے کہ پینٹاگون اس واقعے کی تحقیقات کر رہا ہے۔