پاکستانی شوبز اداکار خالد انعم نے اشرافیہ کی شاہانہ شادیوں میں بھارتی ڈیزائنرز کے ملبوسات کے استعمال پر سوالات اٹھائے ہیں۔ حال ہی میں صدر آصف علی زرداری کی بہن فریال تالپور کی بیٹی اور وزیراعلیٰ پنجاب مریم نواز کے بیٹے جنید صفدر کی شادیوں میں دلہنوں اور اہلِ خانہ نے سبیاساچی مکھرجی، ترون تہیلیانی اور منیش ملہوترا جیسے بھارتی ڈیزائنرز کے لباس پہنے، جس نے سوشل میڈیا پر بحث کو جنم دیا۔
خالد انعم نے گفتگو میں کہا کہ اگرچہ تجارت کھلی ہونی چاہیے، لیکن حالیہ سیاسی اور تجارتی تنازعات کے پیشِ نظر یہ سوال پیدا ہوتا ہے کہ کیا یہ ملبوسات عام شہریوں کے لیے بھی دستیاب ہیں یا صرف مخصوص اشرافیہ کے لیے اجازت ہے۔ انہوں نے مزید وضاحت طلب کی کہ یہ ملبوسات کس طرح حاصل کیے گئے، آن لائن منگوائے گئے یا کسی اور ذریعے سے، اور کیا عام پاکستانی بھی انہیں خرید سکتے ہیں۔