سعودی ہیریٹج اتھارٹی کے زیر انتظام الھفوف کے تاریخی قصر ابراہیم میں ’البشت الحساوی‘ فیسٹیول کا تیسرا ایڈیشن کامیابی کے ساتھ اختتام پذیر ہو گیا۔ فیسٹیول میں ملک بھر اور خلیجی و عرب ممالک سے ہزاروں افراد نے شرکت کی۔
یہ فیسٹیول یونیسکو میں ثقافتی ورثے کے طور پر درج قدیم روایتی ’بشت‘ کی تیاری اور اس کے مختلف پہلوؤں کو اجاگر کرتا ہے۔ قصر ابراہیم میں لگائے گئے سٹالز پر بشت کی تیاری کے مراحل، زری کے کام اور قدیم و جدید آلات کے استعمال کی تفصیلات پیش کی گئیں، تاکہ وزیٹرز الاحسا ریجن کی ثقافت اور صدیوں پر محیط ہنر سے روشناس ہو سکیں۔