وزن کم کرنے والی ادویات نشے کی لت کم کرنے میں مددگار ثابت ہوسکتی ہیں: تحقیق

امریکی تحقیق میں یہ بات سامنے آئی ہے کہ GLP-1 ایگونِسٹ جیسی وزن کم کرنے والی ادویات کوکین، الکوحل اور دیگر منشیات کی لت اور ان سے ہونے والی اموات کے خطرے کو نمایاں طور پر کم کر سکتی ہیں۔

مطالعے میں 6 لاکھ سے زائد ٹائپ 2 ذیابیطس کے سابق فوجیوں کے ریکارڈز کا جائزہ لیا گیا، جس میں معلوم ہوا کہ جن افراد کو پہلے سے نشے کی لت تھی، GLP-1 ادویات استعمال کرنے والوں میں اموات کی شرح 50 فیصد اور اوور ڈوز کے واقعات 40 فیصد کم پائے گئے۔ نئی لت کے خطرے میں بھی 14 فیصد کمی دیکھی گئی۔

محققین نے بتایا کہ یہ اثر مختلف منشیات پر دیکھا گیا لیکن تحقیق مشاہداتی نوعیت کی ہے، اس لیے براہِ راست سبب اور نتیجہ واضح نہیں۔ مزید کلینیکل ٹرائلز کی ضرورت ہے، جبکہ ادویات کی قیمت اور محدود دستیابی بھی چیلنجز میں شامل ہیں۔