پاکستان کی پہلی پروفیشنل ویمن ایم ایم اے فائٹر انیتا کریم ویزا جاری نہ ہونے کے باعث ابوظبی میں ہونے والا مقابلہ نہیں کھیل سکیں گی۔ ان کی فائٹ 31 جنوری کو شیڈول تھی، تاہم ایونٹ انتظامیہ نے انتظار کے بعد ان کی جگہ دوسری فائٹر کو شامل کر لیا۔
انیتا کریم نے کہا کہ انہوں نے مہینوں تیاری کی لیکن ویزا مسائل نے موقع چھین لیا، ایسے مسائل کھلاڑیوں کے کیریئر کے لیے نقصان دہ ہوتے ہیں۔ ان کے منیجر یاسر مشتاق کے مطابق انتظامیہ نے ویزا کے لیے ڈیڈ لائن دی تھی مگر وقت پر دستاویزات مکمل نہ ہو سکیں۔
انہوں نے بتایا کہ انیتا کی اگلی فائٹ اپریل میں متوقع ہے اور متعلقہ حکام سے مطالبہ کیا گیا ہے کہ ایتھلیٹس کے ویزا معاملات کو سنجیدگی سے حل کیا جائے۔