امریکا میں حالیہ مسجد فائرنگ واقعے کے بعد مسلم برادری نے اتحاد اور اپنے حقوق کے تحفظ کے لیے آواز بلند کرنا شروع کر دی ہے۔ بالٹی مور میں ہونے والے ایک بڑے اسلامی اجتماع میں ہزاروں مسلمانوں نے شرکت کی، جہاں اسلاموفوبیا اور مذہبی آزادی کے موضوعات پر گفتگو کی گئی۔
مقررین نے زور دیا کہ مسلمان کمیونٹی کو صرف افسوس تک محدود رہنے کے بجائے عملی اقدامات اور سیاسی سرگرمیوں میں بھی حصہ لینا چاہیے۔ تقریب میں سان ڈیاگو حملے کے متاثرین کو خراجِ عقیدت پیش کیا گیا اور ان کی قربانی کو حوصلے کی علامت قرار دیا گیا۔
اجتماع میں فلسطین کے ساتھ اظہارِ یکجہتی بھی نمایاں رہا، جبکہ مقررین نے امریکا میں بڑھتے اسلاموفوبیا اور مسلم مخالف رویوں پر تشویش کا اظہار کیا۔ منتظمین کے مطابق تقریب کے دوران سخت سیکیورٹی انتظامات کیے گئے تھے۔