پشاور ہائی کورٹ نے خاتون سول جج سے ہتک آمیز رویے پر وکیل کو توہینِ عدالت کے مقدمے میں 6 ماہ قید کی سزا سنا دی۔
سزا جسٹس اعجاز انور نے سنائی۔ عدالت کے مطابق ڈسٹرکٹ بار ایسوسی ایشن سوات کے رکن اسد اللّٰہ نے سول جج کو دھمکیاں دیں اور نامناسب زبان استعمال کی۔
عدالتی فیصلے میں کہا گیا کہ وکیل نے مبینہ طور پر من پسند فیصلہ حاصل کرنے کے لیے دباؤ ڈالنے کی کوشش بھی کی۔ مزید برآں غیر تسلی بخش جواب اور عدالتی احکامات کے باوجود پیش نہ ہونے پر سزا سنائی گئی۔
عدالت نے واضح کیا کہ عدالتی وقار اور ججوں کے احترام پر کوئی سمجھوتہ نہیں کیا جا سکتا۔