ایران پر ممکنہ امریکی کارروائی کے خدشے کے باعث اسرائیل نے اپنی دفاعی تیاریوں میں اضافہ کر دیا ہے۔ اسرائیلی ذرائع ابلاغ کے مطابق ایرانی قیادت کسی بھی ممکنہ ردعمل کے لیے مختلف آپشنز پر غور کر رہی ہے۔
اسرائیلی فضائیہ کا کہنا ہے کہ امکان موجود ہے کہ ایران کسی مرحلے پر اسرائیل کو تنازع میں گھسیٹنے کی کوشش کرے، تاہم یہ واضح نہیں کہ اسرائیل اس کا پہلا ہدف ہوگا یا نہیں۔
اسی تناظر میں اسرائیلی ایئر لائنز نے احتیاطی تدابیر کے طور پر اپنے طیارے بیرونِ ملک منتقل کرنے کی تیاری شروع کر دی ہے۔ اسرائیلی وزیرِ ٹرانسپورٹ کے مطابق متعدد جہاز پہلے ہی قبرص، ایتھنز، تھائی لینڈ، امریکا اور یورپی ممالک بھیجے جا چکے ہیں۔
ادھر اسرائیلی فوج کے سربراہ لیفٹیننٹ جنرل ایال ضمیر نے کہا ہے کہ اسرائیل اپنی سلامتی کو درپیش کسی بھی خطرے سے نمٹنے کے لیے مکمل طور پر تیار ہے۔