اقوام متحدہ میں ایران کے مستقل مندوب امیر سعید ایروانی نے واضح کیا ہے کہ ایران نہ تو کشیدگی بڑھانا چاہتا ہے اور نہ ہی تصادم، لیکن کسی بھی قسم کی جارحیت کا بھرپور اور فیصلہ کن جواب دیا جائے گا۔
سلامتی کونسل کے اجلاس سے خطاب میں انہوں نے ایران سے متعلق اجلاس بلانے پر امریکا کو تنقید کا نشانہ بناتے ہوئے اسے غیر ضروری اور نامناسب قرار دیا۔ ان کا کہنا تھا کہ ایران خود حالیہ دنوں میں دہشتگردی کا نشانہ بنا، جہاں 8 اور 10 جنوری کو داعش طرز کے حملے کیے گئے۔
ایرانی مندوب نے الزام عائد کیا کہ سلامتی کونسل میں سول سوسائٹی کے نام پر امریکی اور اسرائیلی مفادات کو آگے بڑھایا جا رہا ہے۔ انہوں نے کہا کہ ایران مسائل کا حل سفارتکاری کے ذریعے چاہتا ہے، تاہم براہِ راست یا بالواسطہ حملے کی صورت میں ایران سخت ردعمل دے گا۔