آسٹریلیا نے کنگسٹن میں کھیلے گئے تیسرے ٹیسٹ میچ میں ویسٹ انڈیز کو 176 رنز سے شکست دے کر سیریز 0-3 سے اپنے نام کرلی۔ ویسٹ انڈیز کی دوسری اننگز صرف 27 رنز پر سمٹ گئی، جو ٹیسٹ کرکٹ کی تاریخ کا دوسرا کم ترین مکمل اسکور ہے۔
اس اننگز میں ویسٹ انڈیز کے 7 کھلاڑی بغیر کوئی رن بنائے آؤٹ ہوئے، جن میں 4 گولڈن ڈک شامل تھے۔ آسٹریلوی بولرز نے تباہ کن کارکردگی دکھائی، خاص طور پر میچل اسٹارک نے 6 وکٹیں حاصل کرکے 400 وکٹیں مکمل کیں، جبکہ اسکاٹ بولینڈ نے ہیٹ ٹرک کی۔
یہ میچ کئی ریکارڈز کا گواہ رہا، جس میں صرف 1045 گیندیں پھینکی گئیں — 1910 کے بعد سب سے کم گیندوں والا چار اننگز پر مشتمل ٹیسٹ۔ حیران کن طور پر پورے میچ میں کوئی بیٹر ففٹی اسکور نہ کر سکا۔