الباحہ ریجن میں واقع رغدان فاریسٹ پارک اپنی قدرتی خوبصورتی، معتدل موسم اور سرسبز مناظر کے باعث سیاحوں کی بڑی توجہ کا مرکز بن گیا ہے، خصوصاً گرمیوں کے سیزن کے آغاز کے ساتھ یہاں آمدورفت میں اضافہ دیکھا جا رہا ہے۔
یہ جنگل سروات کے پہاڑی علاقے میں واقع ہے جہاں سے تھامہ کی ڈھلوانوں کے دلکش مناظر بھی نظر آتے ہیں۔ گھنے درخت، متنوع قدرتی ساخت اور اکثر چھائی رہنے والی دھند اسے ایک منفرد سیاحتی مقام بناتی ہے، جو نہ صرف عام سیاحوں بلکہ فوٹوگرافی کے شوقین افراد کے لیے بھی کشش رکھتا ہے۔
گزشتہ برسوں میں یہاں سیاحتی سہولیات میں نمایاں بہتری لائی گئی ہے، جن میں پیدل چلنے کے راستے، بیٹھنے کی جگہیں، کھیل کے میدان اور دیگر تفریحی سہولیات شامل ہیں۔ یہ اقدامات سیاحوں کے تجربے کو بہتر بنانے اور علاقے میں سیاحت کو فروغ دینے کے لیے کیے گئے ہیں۔
رغدان فاریسٹ میں مختلف تفریحی سرگرمیاں بھی متعارف کرائی گئی ہیں، جن میں زِپ لائن، معلق پل، لائٹ شوز، 90D سینما، آئینوں کی بھول بھلیاں اور انٹرایکٹو گیمز شامل ہیں، جو ہر عمر کے افراد کو اپنی طرف متوجہ کرتے ہیں۔
حکام کے مطابق یہ قدرتی مقام نہ صرف سیاحت بلکہ مقامی معیشت اور کاروباری سرگرمیوں کی ترقی میں بھی اہم کردار ادا کر رہا ہے۔