معروف اداکارہ ثانیہ سعید نے کراچی کے شہری مسائل پر بات کرتے ہوئے کہا ہے کہ شہر کے بنیادی مسائل کا حل صرف ٹرانسپورٹ منصوبے نہیں بلکہ روزگار کے مواقع پیدا کرنا ہے۔
کراچی میں ایک پریس ٹاک کے دوران انہوں نے کہا کہ اگر لوگوں کے پاس نوکریاں ہی نہیں ہوں تو گرین بس یا دیگر منصوبوں کا فائدہ محدود رہ جاتا ہے۔ ان کے مطابق اصل ضرورت یہ ہے کہ شہریوں کو معاشی سرگرمیوں میں شامل کیا جائے تاکہ وہ باعزت روزگار حاصل کر سکیں۔
ثانیہ سعید نے کراچی کی بڑھتی ہوئی آبادی اور بنیادی ڈھانچے پر دباؤ کا ذکر کرتے ہوئے کہا کہ شہر کے لیے جامع حکمتِ عملی کی ضرورت ہے، جس میں روزگار، معیشت اور شہری منصوبہ بندی کو یکساں اہمیت دی جائے۔
انہوں نے زور دیا کہ صرف ٹرانسپورٹ منصوبے کسی شہر کو ترقی یافتہ نہیں بناتے، اصل ترقی تب ہوتی ہے جب لوگوں کو کام کے مواقع اور مستحکم آمدن میسر ہو۔