وزیرِ اعظم شہباز شریف نے کوہاٹ کے قریب دہشت گردی کا منصوبہ ناکام بنانے والے بہادر شہری لیاقت کو زبردست خراجِ تحسین پیش کیا ہے۔
وزیرِ اعظم کے مطابق لیاقت نے مشتبہ شخص کو روک کر اس کی شناخت پوچھنے کی کوشش کی، جس پر دہشت گرد نے خود کو دھماکے سے اڑا لیا۔ اس واقعے میں لیاقت نے بھی شہادت پائی، تاہم ان کی بہادری نے بڑے جانی نقصان کو ٹال دیا۔
شہباز شریف نے کہا کہ شہید لیاقت نے غیر معمولی جرأت، فرض شناسی اور حب الوطنی کی مثال قائم کی، جبکہ ایسے بہادر شہری دہشت گردی کے خلاف قومی عزم کی حقیقی علامت ہیں۔
انہوں نے مزید کہا کہ پوری قوم دہشت گردی کے خاتمے کیلئے سیکیورٹی فورسز کے ساتھ کھڑی ہے اور شہید لیاقت کی قربانی ہمیشہ یاد رکھی جائے گی۔