یوکرین کی معروف ٹینس کھلاڑی مارتا کوستیوک برسبین اوپن کے فائنل کے بعد اس وقت آبدیدہ ہو گئیں جب انہوں نے اپنے وطن کی صورتحال کا ذکر کیا۔ فائنل میں انہیں بیلاروس کی عالمی نمبر ون ارینا سبالنکا سے شکست ہوئی، تاہم میچ کے بعد انہوں نے منتظمین اور شائقین کا شکریہ ادا کرتے ہوئے یوکرین کے عوام کی مشکلات پر بات کی۔
کوستیوک نے کہا کہ وہ ہر روز دل میں درد کے ساتھ کھیلتی ہیں کیونکہ ان کے ملک میں لوگ شدید سردی، بجلی کی کمی اور بنیادی سہولیات کے بغیر زندگی گزار رہے ہیں۔ انہوں نے بتایا کہ سخت موسم میں لوگ گرم پانی سے محروم ہیں اور ان کی اپنی بہن بھی سردی سے بچنے کے لیے کئی کمبل استعمال کرنے پر مجبور ہے، جو ایک انتہائی تکلیف دہ حقیقت ہے۔