ساہیوال میں محکمہ انسداد دہشت گردی (سی ٹی ڈی) نے کارروائی کرتے ہوئے کالعدم تنظیم تحریک طالبان پاکستان (ٹی ٹی پی) کے مبینہ کارندے کو گرفتار کر لیا۔
سی ٹی ڈی کے مطابق پاکپتن کے علاقے گارڈن ٹاؤن میں دہشت گرد کی موجودگی کی اطلاع پر چھاپہ مارا گیا۔ کارروائی کے دوران ملزم کو حراست میں لے کر اس کے قبضے سے نفرت انگیز مواد، کتابیں، نقدی اور اے ٹی ایم کارڈ برآمد کیے گئے۔
حکام کا کہنا ہے کہ ملزم کالعدم تنظیم کی تشہیر اور لوگوں کو اس میں شمولیت کی ترغیب دے رہا تھا۔ گرفتار شخص کی شناخت آغا محمد کے نام سے ہوئی ہے جو جنوبی وزیرستان کا رہائشی بتایا جاتا ہے۔
ملزم کے خلاف انسداد دہشت گردی ایکٹ کے تحت مقدمہ درج کر کے مزید تفتیش شروع کر دی گئی ہے۔