سپریم کورٹ نے بانی پی ٹی آئی کو ذاتی معالجین تک رسائی دینے کا حکم جاری کر دیا۔ چیف جسٹس پاکستان یحییٰ آفریدی اور جسٹس شاہد بلال حسن پر مشتمل 2 رکنی بینچ نے کیس کی سماعت کی۔
عدالت نے بانی پی ٹی آئی کو ان کے بچوں قاسم اور سلمان سے ٹیلیفونک رابطے کی سہولت فراہم کرنے کی بھی ہدایت کی۔ رپورٹ کے مطابق عمران خان نے جیل میں فراہم کی جانے والی طبی سہولیات کو غیر تسلی بخش قرار دیتے ہوئے ماہر امراضِ چشم ڈاکٹرز تک رسائی کی استدعا کی تھی۔
سماعت کے دوران اٹارنی جنرل منصور عثمان اعوان نے عدالت کو آگاہ کیا کہ حکومت ماہر آنکھوں کے ڈاکٹرز تک رسائی دینے کے لیے تیار ہے۔
چیف جسٹس نے ریمارکس دیے کہ بانی پی ٹی آئی اس وقت اسٹیٹ کسٹڈی میں ہیں اور انہیں سمیت تمام قیدیوں کو یکساں طبی سہولیات ملنی چاہئیں۔ عدالت نے واضح کیا کہ کسی ایک قیدی کو دیگر کے مقابلے میں نمایاں سہولیات دینے کی ہدایت نہیں کی جا رہی بلکہ سب کے ساتھ یکساں سلوک ہونا چاہیے۔
عدالت کے مطابق فرینڈ آف دی کورٹ اور جیل سپرنٹنڈنٹ کی رپورٹس بھی ایک جیسی ہیں۔