مکہ مکرمہ کے شمال مشرق میں واقع وادی عین النبی رھاط قدرتی حسن اور تاریخی ورثے کا حسین امتزاج پیش کرتی ہے، جہاں پہاڑ، نخلستان اور بہتا پانی ایک دلکش منظر تخلیق کرتے ہیں۔
سعودی خبر رساں ایجنسی کے مطابق یہ وادی 1400 سال پرانے تاریخی ورثے کی علامت ہے، جہاں موجود چشمہ آج بھی کھیتوں کی آبپاشی کے لیے استعمال ہوتا ہے اور مقامی آبادی کی زندگی کا اہم حصہ ہے۔
یہ علاقہ ’حرہ رھاط‘ کے آتش فشانی میدان میں واقع ہے، جو تقریباً 300 کلومیٹر پر پھیلا ہوا ایک بڑا ارضیاتی خطہ ہے۔ یہاں کھجوروں کے ہزاروں درخت اور سرسبز مناظر اس کی زرعی اہمیت کو ظاہر کرتے ہیں۔
سیاحوں کے لیے بنائے گئے مخصوص راستے اور قدرتی مناظر اسے فوٹوگرافی اور فطرت کے شوقین افراد کے لیے پرکشش مقام بناتے ہیں، جبکہ بارشوں کے بعد قریبی وادی غزان کا منظر مزید دلکش ہو جاتا ہے۔
یہ علاقہ نہ صرف قدرتی خوبصورتی بلکہ تاریخی اور ثقافتی ورثے کے امتزاج کے باعث وژن 2030 کے تحت سیاحت کے فروغ میں اہم کردار ادا کر رہا ہے۔