امریکا اور ایران کے درمیان جنگ بندی کے بعد ایران نے آبنائے ہرمز کو محدود سطح پر کھولنے کا اعلان کیا ہے، تاہم اس کے ساتھ سخت شرائط بھی نافذ کر دی گئی ہیں۔
رپورٹس کے مطابق روزانہ صرف 15 جہازوں کو گزرنے کی اجازت ہوگی اور ہر جہاز کے لیے پیشگی منظوری لازمی قرار دی گئی ہے، جبکہ اس عمل کی نگرانی پاسدارانِ انقلاب کریں گے۔ ایران کا کہنا ہے کہ صورتحال اب پہلے جیسی نہیں رہے گی۔
ایران نے جنگ بندی برقرار رکھنے کے لیے اپنے منجمد اثاثوں کی بحالی کو دو ہفتوں میں یقینی بنانے کی شرط رکھی ہے، ساتھ ہی مطالبہ کیا ہے کہ جنگ کے خاتمے کو اقوامِ متحدہ کی قرارداد کے ذریعے تسلیم کیا جائے، ورنہ دوبارہ کشیدگی پیدا ہو سکتی ہے۔
مزید برآں ایران نے امریکا سے خطے میں فوجی موجودگی نہ بڑھانے کا مطالبہ کیا ہے اور یورینیئم افزودگی سے متعلق معاہدے پر عمل جاری رکھنے کا عندیہ دیا ہے۔
دوسری جانب لبنان کا معاملہ اب بھی تنازع کا باعث ہے، جہاں ایران اسے معاہدے میں شامل کرنا چاہتا ہے جبکہ امریکا اور اسرائیل اس سے متفق نہیں۔ ایران نے خبردار کیا ہے کہ اگر لبنان پر حملے جاری رہے تو آبنائے ہرمز دوبارہ بند کی جا سکتی ہے۔
ادھر امریکا اور ایران کے درمیان امن معاہدے کے لیے اہم مذاکرات آج اسلام آباد میں متوقع ہیں، جس کے باعث سیکیورٹی سخت کر دی گئی ہے اور غیر ملکی وفود کی آمد جاری ہے۔