لبنان میں اسرائیلی حملوں کے بعد ایران نے دو ماہ میں پہلی بار براہِ راست اسرائیل پر میزائل حملے کیے، جس سے خطے میں کشیدگی ایک بار پھر شدت اختیار کر گئی۔ تجزیہ کاروں کے مطابق ایران نے یہ پیغام دیا ہے کہ لبنان اور حزب اللّٰہ کے خلاف کارروائیوں کو نظر انداز نہیں کیا جائے گا۔
رپورٹس کے مطابق بیروت کے جنوبی علاقوں پر حملوں کے بعد ایران نے جوابی کارروائی کی، جبکہ بعد میں اسرائیل نے بھی ایران کے مختلف مقامات کو نشانہ بنایا۔ ایرانی حکام نے خبردار کیا ہے کہ لبنان پر مزید حملوں کی صورت میں ردعمل زیادہ سخت ہو سکتا ہے۔
ماہرین کا کہنا ہے کہ لبنان ایران کی علاقائی حکمتِ عملی میں اہم حیثیت رکھتا ہے، اسی لیے وہاں کی صورتحال کو تہران اپنی سلامتی سے جوڑ کر دیکھتا ہے۔ ان کے مطابق موجودہ حالات میں وقتی طور پر کشیدگی کم ہو سکتی ہے، تاہم مستقل امن اور مذاکراتی پیش رفت کے امکانات مزید پیچیدہ ہو گئے ہیں۔