ایک تحقیق کے مطابق روزانہ سات گھنٹے کی صحت مند نیند لینے سے متوقع عمر میں چار سال تک اضافہ ہو سکتا ہے اور جوانی میں موت کا خطرہ 24 فیصد تک کم ہوتا ہے۔ برطانیہ کی ہیلتھ انشورنس کمپنی اور لندن اسکول آف اکنامکس کے تجزیے میں یہ بات سامنے آئی کہ مناسب نیند نہ لینے والے افراد میں ذہنی صحت کے مسائل، دل کی بیماری، ٹائپ 2 ذیابیطس اور کینسر جیسے خطرات زیادہ پائے جاتے ہیں۔
رپورٹ کے مطابق برطانیہ میں 41 فیصد افراد سات گھنٹے سے کم سوتے ہیں، جبکہ 42 فیصد افراد سات سے آٹھ گھنٹے کی مثالی نیند لیتے ہیں۔ تحقیق میں بتایا گیا کہ باقاعدگی سے ورزش کرنے والوں کی متوقع عمر میں چھ سال، اور صحت مند وزن رکھنے والوں کے لیے پانچ سال اضافہ ممکن ہے، جبکہ سات گھنٹے کی صحت مند نیند لینے والے دو سے چار سال تک زیادہ زندہ رہ سکتے ہیں۔