ایلون مسک کے مصنوعی ذہانت پر مبنی چیٹ بوٹ گروک اس وقت عالمی توجہ کا مرکز بن گیا جب اس کی ایک پیش گوئی درست ثابت ہوتی نظر آئی۔ ایک رپورٹ کے مطابق گروک نے مبینہ طور پر ایران پر ممکنہ امریکی اور اسرائیلی حملوں کے لیے 28 فروری کی تاریخ پہلے ہی بتا دی تھی۔
یہ پیش گوئی ایک تجربے کے دوران سامنے آئی جس میں مختلف اے آئی ماڈلز سے ممکنہ فوجی کارروائی کی تاریخ پوچھی گئی۔ دیگر ماڈلز نے واضح تاریخ دینے سے گریز کیا یا عمومی اندازے لگائے، جبکہ گروک نے دو مرتبہ 28 فروری کی نشاندہی کی اور اس کی وجہ جنیوا میں جاری سفارتی مذاکرات کے ممکنہ اختتام کو قرار دیا۔
بعد میں اسی تاریخ کے قریب حملوں کی خبریں سامنے آئیں تو سوشل میڈیا پر اس پیش گوئی پر بحث شروع ہو گئی۔ ماہرین کے مطابق یہ ممکن ہے کہ اے آئی نے عوامی سطح پر موجود معلومات، بیانات اور حالات کو جوڑ کر یہ اندازہ لگایا ہو، تاہم اس واقعے نے ایلون مسک کی اے آئی کمپنی کے لیے خاصی توجہ حاصل کر لی ہے۔