لاہور میں بسنت کے موقع پر امن و امان اور مذہبی ہم آہنگی برقرار رکھنے کے لیے دفعہ 144 کے تحت خصوصی پابندیاں نافذ کر دی گئی ہیں۔ سرکاری نوٹیفکیشن کے مطابق ایسی پتنگیں جن پر مقدس شخصیات، مذہبی مقامات، مقدس کتب، کسی ملک کا جھنڈا یا سیاسی جماعتوں کی علامات بنی ہوں، ان کی تیاری، خرید و فروخت اور استعمال 30 روز کے لیے ممنوع قرار دیا گیا ہے۔
حکام کا کہنا ہے کہ اس اقدام کا مقصد کسی بھی ممکنہ اشتعال انگیزی کو روکنا ہے۔ سادہ یا مختلف رنگوں کی بغیر تصویر والی پتنگیں اڑانے کی اجازت ہوگی، جبکہ خلاف ورزی کرنے والوں کے خلاف قانونی کارروائی عمل میں لائی جائے گی۔