وزیراعظم شہباز شریف اور وزیر داخلہ محسن نقوی نے پشاور میں فیڈرل کانسٹیبلری ہیڈکوارٹر پر ہونے والے دہشت گرد حملے کی سخت مذمت کرتے ہوئے شہید اہلکاروں کو خراجِ عقیدت پیش کیا ہے۔ وزیراعظم نے ہدایت کی کہ زخمیوں کو فوری اور بہترین طبی امداد فراہم کی جائے اور واقعے کے ذمہ دار عناصر کو جلد از جلد قانون کے کٹہرے میں لایا جائے۔ ان کا کہنا تھا کہ سیکیورٹی فورسز کی بروقت جوابی کارروائی نے بڑے سانحے کو روک دیا۔
وزیر داخلہ محسن نقوی نے شہید ایف سی اہلکاروں کے لواحقین سے دلی تعزیت کا اظہار کیا اور کہا کہ شہید جوان قوم کے ہیرو ہیں جن کی قربانی ہمیشہ یاد رکھی جائے گی۔
وزیراعلیٰ خیبر پختونخوا سہیل آفریدی نے بھی حملے کی شدید مذمت کرتے ہوئے آئی جی پولیس سے رپورٹ طلب کی اور زخمی اہلکاروں کے علاج میں کسی قسم کی کوتاہی نہ برتنے کی ہدایت کی۔ ان کا کہنا تھا کہ فورسز کی بہادری نے بڑی تباہی کو ٹال دیا۔
واضح رہے کہ حملے کو ناکام بناتے ہوئے سیکیورٹی فورسز نے تین دہشت گردوں کو مار گرایا، جبکہ ایف سی کے تین جوان شہید ہوئے۔