کراچی میں دو مختلف ٹریفک حادثات، 3 افراد جان سے گئے

کراچی میں پیش آنے والے دو الگ الگ ٹریفک حادثات میں مجموعی طور پر 3 افراد جاں بحق جبکہ ایک شخص زخمی ہو گیا۔

پنجاب کالونی انڈر پاس کے قریب ہونے والے حادثے میں شدید زخمی شخص بھی اسپتال میں دم توڑ گیا، جس کے بعد جاں بحق افراد کی تعداد 2 ہو گئی۔ پولیس کے مطابق متوفیوں کی شناخت ریاض اور اسحاق کے نام سے ہوئی ہے، جبکہ متاثرہ افراد کا تعلق پنجاب کے شہر جلال پور سے تھا۔ حکام کا کہنا ہے کہ یہ افراد مزدوری کے بعد اپنے گھر واپس جا رہے تھے کہ حادثے کا شکار ہو گئے۔

پولیس کے مطابق حادثے میں ملوث ٹرک کا ڈرائیور اور اس کا معاون موقع سے فرار ہو گئے، جن کی تلاش جاری ہے۔

ادھر گارڈن کے علاقے میں ایک تیز رفتار گاڑی کی ٹکر سے ایک خاتون جاں بحق ہو گئی۔ پولیس نے خاتون کی شناخت طاہرہ کے نام سے کی ہے اور واقعے کی مزید تحقیقات کی جا رہی ہیں۔