کراچی میں ویکسی نیشن مہم کے آغاز پر وزیر صحت سندھ ڈاکٹر عذرا فضل پیچوہو نے کہا کہ ایچ پی وی سے بچاؤ کی ویکسین خواتین کی جانیں بچانے کے لیے بہت ضروری ہے، کیونکہ سروائیکل کینسر کی علامات عام طور پر دیر سے ظاہر ہوتی ہیں اور آخری مرحلے میں یہ انتہائی تکلیف دہ مرض بن جاتا ہے۔
انہوں نے کہا کہ یہ واحد کینسر ہے جس کا وائرس دریافت ہوا ہے اور اس سے بچاؤ ممکن ہے۔ ان کا کہنا تھا کہ خواتین معاشرے کی اصل قوت ہیں اور ان کی صحت کا تحفظ قومی ترقی کے لیے اہم ہے۔
تقریب میں وزیر تعلیم سندھ سردار شاہ نے بھی خطاب کیا اور کہا کہ تمام اسکولز کو ویکسی نیشن مہم میں تعاون کا پابند کیا گیا ہے، کیونکہ یہ ویکسین بچیوں کی حفاظت کے لیے ناگزیر ہے۔