بنگلادیش کرکٹ بورڈ کے ڈائریکٹر نظم الاسلام کے متنازع بیان کے بعد قومی ٹیم کے کھلاڑیوں نے سخت ردِعمل دیتے ہوئے ہر طرز کی کرکٹ کھیلنے سے انکار کی دھمکی دے دی ہے۔ کھلاڑیوں نے ان کے استعفے کا مطالبہ بھی کر دیا ہے۔
نظم الاسلام نے ورلڈ کپ کے ممکنہ بائیکاٹ پر کھلاڑیوں کو مالی معاوضہ نہ دینے کی بات کی تھی جس پر شدید ناراضی سامنے آئی۔ اس صورتحال کے باعث بنگلادیش پریمیئر لیگ کے میچز بھی متاثر ہونے کا خدشہ ظاہر کیا جا رہا ہے۔
کرکٹرز ویلفیئر ایسوسی ایشن کے صدر محمد متھون نے کہا ہے کہ اگر نظم الاسلام نے بی پی ایل سے قبل استعفیٰ نہ دیا تو کھلاڑی میدان میں نہیں اتریں گے۔ ادھر کرکٹ بورڈ نے بھی ان کے بیان سے لاتعلقی ظاہر کرتے ہوئے کہا ہے کہ کھلاڑیوں کی توہین کرنے والوں کے خلاف کارروائی کی جائے گی۔