شمالی کوریا نے ایران میں مجتبیٰ خامنہ ای کے نئے سپریم لیڈر منتخب ہونے کے فیصلے کا خیر مقدم کرتے ہوئے امریکا اور اسرائیل کے ایران پر حملوں کی شدید مذمت کی ہے۔ سرکاری خبر رساں ادارے کے مطابق شمالی کوریا کی وزارتِ خارجہ کے ترجمان نے کہا کہ ایران کی قیادت کا انتخاب ایرانی عوام کا حق ہے اور اس فیصلے کا احترام کیا جانا چاہیے۔
ترجمان نے امریکا اور اسرائیل کی فوجی کارروائیوں کو غیر قانونی جارحیت قرار دیتے ہوئے کہا کہ ایسے اقدامات خطے کے امن و استحکام کے لیے خطرہ ہیں اور عالمی برادری کو اس کی مذمت کرنی چاہیے۔
دوسری جانب شمالی کوریا نے رہنما کم جونگ اُن کی نگرانی میں جدید جنگی بحری جہاز سے اسٹریٹیجک کروز میزائل کا تجربہ بھی کیا۔ کم جونگ اُن نے اس موقع پر ملک کی جوہری دفاعی صلاحیت کو مزید مضبوط بنانے کے عزم کا اظہار کیا۔
بین الاقوامی میڈیا کے مطابق پیانگ یانگ کا مؤقف ہے کہ اس کا جوہری پروگرام بیرونی خطرات، خصوصاً امریکا اور اس کے اتحادیوں سے دفاع کے لیے ضروری ہے۔