اقتصادی سروے میں ملی جلی تصویر، کئی اہم اہداف پورے نہ ہو سکے

رواں مالی سال کا قومی اقتصادی سروے آج پیش کیا جائے گا، جس میں معیشت کی مجموعی کارکردگی کی تفصیلات شامل ہیں۔ دستاویز کے مطابق ملکی معیشت نے ترقی تو کی، تاہم کئی اہم شعبے مقررہ اہداف حاصل کرنے میں کامیاب نہ ہو سکے۔

اقتصادی سروے کے مطابق جی ڈی پی کی شرح نمو 3.7 فیصد رہی جو 4.2 فیصد کے ہدف سے کم ہے۔ زرعی اور صنعتی شعبوں کی کارکردگی بھی توقعات کے مطابق نہ رہی، جبکہ بجلی، گیس اور پانی کی فراہمی سے متعلق شعبوں میں نمایاں منفی نمو ریکارڈ کی گئی۔

دوسری جانب خدمات، تعلیم، صحت اور انفارمیشن کمیونیکیشن کے شعبوں نے مقررہ اہداف سے بہتر نتائج دیے۔ دستاویز میں یہ بھی بتایا گیا ہے کہ بیرونِ ملک مقیم پاکستانیوں کی ترسیلاتِ زر میں اضافہ ہوا اور پہلے 10 ماہ کے دوران یہ 34 ارب ڈالر تک پہنچ گئیں، جو معیشت کے لیے ایک مثبت اشارہ قرار دیا جا رہا ہے۔