وزیراعظم شہباز شریف نے ملک میں کاروباری اور تجارتی معاملات سے متعلق تنازعات کو جلد نمٹانے کے لیے خصوصی تجارتی عدالتوں کے قیام کا فیصلہ کر لیا ہے۔
اس مقصد کے لیے مجوزہ قانون تیار کرنے کی خاطر ایک اعلیٰ سطحی کمیٹی تشکیل دی گئی ہے، جس کی سربراہی وفاقی وزیر قانون اعظم نذیر تارڑ کریں گے۔ کمیٹی میں اٹارنی جنرل، وزیر مملکت برائے خزانہ اور دیگر قانونی ماہرین بھی شامل ہوں گے۔
کمیٹی موجودہ نظام کا جائزہ لے کر تجارتی مقدمات کے تیز رفتار اور مؤثر حل کے لیے سفارشات مرتب کرے گی اور نئے قانون کا مسودہ تیار کرے گی۔ علاوہ ازیں، ثالثی قوانین میں بہتری اور بین الاقوامی معاہدوں کے تقاضوں کو قومی قانون کا حصہ بنانے سے متعلق تجاویز بھی پیش کی جائیں گی۔
کمیٹی اپنی تفصیلی رپورٹ اور سفارشات 45 روز کے اندر وزیراعظم کو پیش کرے گی۔