پاکستانی ٹی وی کی معروف اداکارہ سارہ عمیر نے اپنی طلاق سے متعلق حالیہ بیان پر یوٹرن لے لیا ہے۔
انہوں نے کہا کہ مرد خواتین کی زندگی میں سب سے بڑا اثاثہ ہوتے ہیں اور ان کے بغیر زندگی نامکمل ہے۔
حال ہی میں سارہ عمیر نے میزبان و اداکار احمد علی بٹ کی پوڈکاسٹ میں گفتگو کی، جہاں اپنے کیریئر اور ذاتی زندگی پر کھل کر بات کی۔ اس دوران انہوں نے اپنے شوہر اور ہدایتکار محسن طلعت کا بار بار ذکر کیا اور انہیں سابق شوہر قرار دینے سے گریز کیا۔
سارہ عمیر کا کہنا تھا کہ پہلے انہیں اپنے شوہر کے کیریئر سے متعلق مشورے نظر انداز کرنے پر نقصان اٹھانا پڑا، لیکن اب وہ ہر کردار میں ان کے مشورے لیتی ہیں۔ انہوں نے کہا کہ انڈسٹری میں ان کا کوئی حقیقی دوست نہیں، سوائے محسن طلعت کے، جو ان کے بچوں کے باپ بھی ہیں۔
اداکارہ نے مزید کہا کہ مرد عورت کی زندگی میں نگہبان اور کفیل کی حیثیت رکھتے ہیں، اور عورتوں کے مقابلے میں رتبے میں بلند ہوتے ہیں۔ ان کے مطابق مردوں کا خواتین پر ایک حد تک اختیار ہونا ضروری ہے۔
واضح رہے کہ پہلے سارہ عمیر نے ایک پروگرام میں اپنی طلاق کے صدمے اور ریئلٹی شو “تماشہ” میں شرکت کے حوالے سے بھی بات کی تھی تاکہ وہ اس صدمے سے نکل سکیں۔